Wednesday, October 2, 2019

အောင်ဆန်းစုကြည်၏ကဗျာ

အောင်ဆန်းစုကြည်၏ ကဗျာ
**************************
*ဘ၀ ဟူသည်
တိုတောင်း လှပေစွ
ကန်ရေပြင်မှာတတ်သော
ရေပွက်မျှသာ ဖြစ်တယ်၊
*ကွေးသောလက်များ
ဆန့်မသွားမီ
မတည်သောအသက်
ခန္ဓာ ဟူသည်
ဇာတိ ဇရာ မရဏ
သောက ပရိဒေ၀ မနိစ္စ
အမြဲမှန်ကန်သောအရာ
မမြဲခြင်းသာဖြစ်တယ်၊
*ဘုရားရှင်သော်မှ မလွဲနိုင်တဲ့တရား
အနိစ္စ သေဆုံးခြင်း၏တရား......
*တနေ့တချိန်
လေမှာလွင့်သော ပွင့်ချပ်နယ်
ကျွန်မ သေဆုံးပါလိမ့်မယ်၊
*ကျွန်မ အသက် လူကြီးအရွယ်
သွားရမဲ့လမ်း ပြင်ဆင်ခဲ့ပါတယ်၊
*ကျွန်မ ကိုယ် ကျွန်မ
ဖေဖေ့လို
အာဇာနည်လို့ မယူဆပါဘူး
အမှန်တရားနဲ့ဥပဒေသာ
မြတ်နိုးပါတဲ့ သာမန်လူ
မြန်မာအမျိုးကောင်းစားရေးကို
ရှေ့ရှု့သူသာဖြစ်တယ်၊
*အကယ်ရ်ျကျွန်မသေလွန်တဲ့အခါ
မငိုပါနဲ့မပူဆွေးကြပါနဲ့
ကြီးကြီးကျယ်ကျယ် စျာပနပွဲ
မလုပ်ကြပါနဲ့၊
ကျွန်မကို ချစ်သူမချစ်သူ
မည်သူမဆိုလာရှု့နိုင်တယ်
ပုပ်ပွ ဖူးယောင် လူသေကောင်၏
မျက်မြင်မုချ အသုဘကမ္မဌာန်း
အိုနာ သေခြင်၏ မမြဲသောလမ်း၊
*ကျွန်မ သေဆုံးပြီးနောက်
ချန်ထားခဲ့ပါရစေ
ကျွန်မ၏ အထွဠ်မြတ်ဆုံး ဆံပင်
ရွှေတိဂုံဆံတော်ရှင်သို့ လှူဒါန်းပါ၊
ကျွန်မရဲ့မျက်ကြည်လွှာ
အလင်းမရသူကို လှူဒါန်းပေးပါ၊
ကျွှန်မရဲ့ နှလုံးသား ကျောက်ကပ်
အသည်းကလီဇာများ
ကောင်းသေးပါက
လိုသူများအားလှူဒါန်းပေးပါ၊
*မသာတစ်ခေါက်
ကျောင်းဆယ်ခေါက်
နာရေးကူညီသော စေတနာရှင်
စင်ကြယ်သောကုသိုလ်နဲ့ကိုကျော်သူ
ကျွန်မ အသက်မဲ့ ခန္ဓာကို
လှူပါတယ်
ဖုတ်ကျည်းသဂြိုလ်ပေးပါ၊
*ပုပ်ပွလာမဲ့ခန္ဓာအား
မီးသြ၈ိုလ်ပြီး
ရလာသောခန္ဒာ၏ပြာမြေဇာ
အပင်တို့အတွက်
မြေသြဇာကြွေးပေးပါ၊
*နောင်လာနောက်သားများအတွက်
ကျွန်မ၏နေအိမ်(သို့)
ကျမ၏အကျဉ်းထောင်
အင်းစိန်ထောင်ခွဲ
အမှတ်(၅၄)တက္ကသိုလ်ရိပ်သာလမ်း
အောင်ဆန်းစုကြည်၏ပြတိုက်အဖြစ်
ကျွန်မ၏အသုံးအဆောင် စာအုပ်
တီးသူမဲ့ စန္ဒယား
ကျွန်မ၏ မြန်မာအ၀တ်အစား
ရိုးသားသော
မြန်မာအမျိုးသမီး၏တန်ဖိုးများ
နောင်လာနောက်သားများရှူ့မြင်စေ၊
*ကျွန်မ၏ကျန်ရစ်သော
ဘဏ်ငွေသားအနည်းငယ်
ကျမ၏စျာပန စရိတ်နှင့်
တရားနာလာ သံဃာအိုများအတွက်ကျန်းမာရေး
ဖိဝိတဒါန ဆေးအလှူ
ကွယ်လွန်သူ မိဘများအားအမှူထားရ်ျ
ကျမနှင့်ကွယ်လွန်သော ခင်ပွန်းအတွက်
သားများမှ ရေစက်ချ..အမျှဝေစေချင်ပါတယ်....
*ကျမရသော ငြိမ်းချမ်းရေး
 နိုဘယ်ဆုငွေသား
 $1.3 millionအား
 ကိုယ်ကျိုးအတွက်မသုံးစွဲ
 တပြားမချန်
 မြန်မာပြည်သူများအတွက်
 ကျန်းမာရေးနဲ့ပညာရေး ရံပုံငွေ
 လှူဒါန်းခဲ့ပါတယ်....
 ကိုယ်စိတ်နှစ်ဖြာ ကျန်းမာချမ်းသာကြပါစေ........
 ကြားကြားသမျှ အမျှ အမျှ အမျှ
 ယူတော်မူပါ၊
*အမျိုးအတွက်ထားတဲ့
 အမေ့ရဲ့စေတနာကို
 နားလည်ပါရမီဖြည်ပေးသူ သားများ
 အမေ့ဘ၀မှာ မွေးရကျိုးနပ်ပါတယ်
 အမေ့ဘ၀အတွက်အကောင်းဆုံး
 ဘုရားပေးသောဆုလာဒ်
 ဒီသားများသာဖြစ်ပါတယ်၊
*ဒီသားများအတွက်
 အမေမွေးခဲ့သော ဇီဝိတ အသက်
 အဖေပေးခဲ့သော ပညာမှတပါး
 အခြားပေးရန် စည်းစိမ်မွေမရှိ
 စိတ်ဓါတ်နှင့်ကြံခိုင်သော မျိုးရိုး၏အမွေ
 အောင်ဆန်းမျိုးရိုး..ဆက်ကျန်ပါစေ၊
*အတူနေ မမဒေါ်ခင်၀င်းနှင့်သမီးများ
 ကျွန်မအား...
 စောင့်ရှောက်သောကျေးဇူး
 အထူးမမေ့ပါ၊ ကျေးဇူးတင်ပါတယ်၊
*ဆေးဝါးကုသပေးသော
 မောင်ငယ် ဒေါက်တာ တင်မျိုး၀င်း
 သမားစိတ်ရင်းကြောင့်ကျမ
 အသက်ရှည်...
 ကျေးဇူးဆပ်စရာ ပစ္စည်းမဲ့သူ ကျမ
 ဦးချပြီး ဆပ်ပါရစေ၊
*ပြည်တွင်း ပြည်ပ
 ကျွန်မကို ချစ်ခင်ကြသော
 ကျွန်မကို အားပေးကြသော
 မိတ်ဆွေသင်္ဂဟ
 သိသူ မသိသူမှန်သမျှ
 ကျွန်မပြုသောကုသိုလ် အဖို့ဘာဂ
 ဝေမျှပါတယ်
 ရွှင်လန်းကြပါစေ၊
*ကျွန်မ၏တဦးတည်းသော
 ချစ်ရသော အကိုကြီး
 သွေးသားစပ်သူ ဦးအောင်ဆန်းဦးအတွက်
 ကျွန်မအဖေ၏ ပန်းချီတချပ်
 သူမသေခင်..ခေါင်းရင်းမှာချိတ်ဖို့
 ပေးအပ်ခဲ့တယ်၊
*အနှစ်၂၀
 သက်တမ်းရ သက်တော်ရှည်
 အဝေးရောက် ၀န်ကြီးချုပ်
 ကျွန်မ၏တ၀မ်းကွဲမောင်
 ဒေါက်တာစိန်၀င်း
 ကျွန်မရဲ့အနှစ်(၂၀)
 အချုပ်ကာလအတွင်း
 ကျွန်မရတဲ့ဆုတွေလက်ခံတဲ့အခါ
 စင်ပေါ်တက်
 မျက်နာပြဖေါ်ရတာ
 အထူးကျေးဇူးတင်ပါတယ်၊
*ဖေဖေ့မျက်နာနဲ့
 ကျွန်မအပေါ်မရှိတဲ့
 အပြစ်ကိုတင် အကွက်ဆင်
 အတင်းထောင်ချ
 သပ်ရှိုပြန်ကယ်ပြတဲ့
 အတုယူချီးပွမ်းထိုက်ပါသော
 မှူးကြီးသန်းရွှေရဲ့မေတ္တာ စေတနာ
 မှတ်ကျောက်စာထိုးခဲ့ပါတယ်
 ကလိမ်ခြုံ နအဖ၏
 ဂန္ဓ၀င် မိချောင်းမျက်ရည်၊
*ကွန်မ မခေါ်ဘဲ
 အလည်လာတဲ့ဧည့်သည်
 ကျွန်မအသက်ဘေးအတွက် သူ
 စိုးရိမ်တယ်..
 မောပမ်းမေ့လဲနေသော
 ဆီးချိုလူနာသည်သူ
 ပုတုဇနော ဥမ္မတကော အဆိုရှိ
 တကယ်မှန်မှန် မမှန်မှန်
 ဟုတ်သော်ရှိ  မဟုတ်သော်ရှိ
 ခမြာ စေတနာနဲ့
 သတိပေးရန်ကြံတဲ့အတွက်
 သူ၏ထားရှိသော ဂရုဏာ စေတနာ
 ကျေးဇူးတင်ထိုက်ပါတယ်၊
*ကျွန်မသွားတဲ့အခါ့
 တရား သံဝေဂရ
 မျက်ရည်မကျပါနဲ့
 မပြီးဆုံးသေးတဲ့ ကျွန်ရဲ့၀တ္တရား
 ကျရာနေရာ ကူညီပါအ၀င်
 ဖြည့်ဆည်းပေးကြပါ
 ကျွန်မအတွက်ထားတဲ့ ချစ်မေတ္တာ
 တိုင်းပြည်အမျိုးအတွက်
 လက်ဆင့်ကမ်းကြိုးစားပေးပါ
 အဖေ ပေးတဲ့လွတ်လပ်ရေး
 ကျွန်မ လက်ထက်မှာ မရသေးခင်
 ကျွန်မ သေလွန်ခဲ့ပါလျှင်
 ကျွန်မကိုယ်စား
 တာ၀န်ဆက်ယူပေးနိုင်ပါစေ
 တနေ့မှာ ဒေါင်းမျိုးနွယ်ဆက်
 ပြန်ခေါင်းထောင်ထကြပါစေ
ဒို့မြန်မာအမျိုး သိက္ခာ မျိုးနွယ်ဆွေ
 အာဏာရှင်စံနစ် ပြုတ်ကြပါစေ။   ။

           မှတ်ချက်။  ။အမေဒေါ်အောင်ဆန်းစုကြည်၏ ကိုယ်တိုင်ရေးကဗျာဖြစ်ပါသည်။
                         (22.06.2013)

No comments:

Post a Comment